ការរៀបចំតុបតែងបន្ទប់ទទួលភ្ញៀវ គឺធ្វើយ៉ាងណាឲបរិយាកាសក្នុង បន្ទប់មានក្លិនល្អ មានការចាប់អារម្មណ៍ បង្កើតនូវភាពស្រលាញ់ និងផ្ដល់ការ ស្ងើចសរសើរពីភ្ញៀវ។ បន្ទប់ទទួលភ្ញៀវចែកចេញជាពីរប្រភេទ ដែលក្នុងនោះ ប្រភេទទីមួយជាប្រភេទបន្ទប់បិតជិត និងប្រភេទបន្ទប់បើក។ បន្ទប់បិតជិត ជាប្រភេទបន្ទប់ដែលស្ទើរតែបិតជិតទាំងអស់ គ្រាន់តែផ្នែកណាមួយនៃជ្រុង បន្ទប់អាចភ្លឺមើលឃើញធម្មជាតិក្នុងសួនច្បារខាងក្រៅផ្ទះ ឆ្លងកាត់តាមរយៈ បង្អួចកញ្ចក់ពណ៌ទឹកសមុទ្រ ដែលជាពណ៌ត្រជាក់ភ្នែក និងជាទីគយគន់នៃ អ្នករាល់គ្នា។ នៅក្នុងបន្ទប់បិតជិតនេះគេមានដាក់វត្ថុតាំងដែលមានតម្លៃ និង មានអត្ថន័យយ៉ាងសំខាន់ដូចនៅក្នុងបន្ទប់ ខ្លះមានដាក់តាំងរូបក្ងោកពីរ ដើម្បី បង្ហាញនូវការស្រលាញ់ និងភាពស្និទ្ធស្នាល។ ខ្លះទៀតគេដាក់តាំង ជារូប សត្វដំរី ជាតំណាងកម្លាំងថាមពល អំណាចរិទ្ធីបារមីខ្លាំងដូចសត្វដំរី។ បន្ទប់ ប្រភេទ ទី២ ជាប្រភេទបន្ទប់បើក ដែលក្នុងការរៀបចំរចនាតុបតែង មាន លក្ខណៈ ប្រហាក់ប្រហែលទៅនឹងបន្ទប់បិទជិតដែរ គ្រាន់តែមួយផ្នែកណា មួយមានដាក់ព្យួរផ្ទាំងក្រណាត់ ឬបន្ទះឈើខណ្ឌជាបន្ទប់។ តែផ្ទាំងខណ្ឌនោះ មានប្រហោងអាចមើលឃើញទៅផ្នែកខាងក្រៅបាន។លោក កាយ លីកីមសែ ប្រធានផ្នែកប្រតិបត្តិក្រុមហ៊ុនដេក័រ ហ្គាឡារី (Decor Gallery) មានប្រសាសន៍ថា ការរៀបចំបន្ទប់ទទួលភ្ញៀវគឺវាអាស្រ័យ លើទិសនៃគេហដ្ឋានរបស់យើង ថាតើផ្ទះបែរមុខទៅទិសខាងណា ហើយច្រក ចូលមានទំហំធំ ឬ តូច។ បន្ទប់ទទួលភ្ញៀវភាគច្រើន គេមិនសូវនិយមធ្វើចំហរ ទាំងអស់ទេ ព្រោះគេចង់រក្សាអាថ៌កំបាំង និងភាពស្ងាត់ស្ងៀម។
សម្ភារៈគ្រឿងសង្ហារឹម និង ឧបករណ៍រៀបចំសម្រាប់ប្រើប្រាស់ក្នុងបន្ទប់មានលក្ខណៈទំនើប ដើម្បីធ្វើឲបន្ទប់កាន់តែចាប់អារម្មណ៍ខ្លាំង។ បន្ទប់ក៏មានការប្រើប្រាស់នូវប្រព័ន្ធភ្លើង ដោយបំពាក់អំពូលភ្លើងបានគ្រប់គ្រាន់ សមស្របទៅនឹងខ្នាតបន្ទប់។ អំពូលភ្លើងគឺត្រូវជ្រើសរើសទៅតាមពន្លឺភ្លើង ឬងងឹតនៅផ្នែកណាមួយនៃបន្ទប់ដូចជានៅតាមជញ្ជាំង លើពិដាន និងលើក្បាលសសរជាដើម។ អំពូលភ្លើងជាប្រភេទអំពូលដែលមាន ពន្លឺដូចជាពន្លឺថ្ងៃ ព្រោះពន្លឺថ្ងៃ មិនភ្លឺពេក ហើយក៏មិនងងឹតពេក គឺមានពន្លឺ ស្រទន់។
បន្ទប់មានភាពទូលំទូលាយ បំពាក់គ្រឿងសង្ហារឹមយ៉ាងស្អាតនិងមានរបៀបរៀបរយប្រកបដោយគំនិត ច្នៃប្រឌិតយ៉ាងប៉ិនប្រសប់ក្នុងការរៀបចំ។ សាឡុងគួរតែជ្រើសរើសពណ៌ទៅតាមពណ៌ជញ្ជាំងបន្ទប់ ពិដាន និង នៅលើឥដ្ឋការ៉ូក្នុងបន្ទប់មានដាក់កម្រាលព្រំសមនឹងពណ៌បន្ទប់ផងដែរ ។
លក្ខណៈពិសេស នៃបន្ទប់ទទួលភ្ញៀវគឺទំហំ ពណ៌ និងក្លិន។ លោក លីកីមសែ បាននិយាយទាក់ទងទៅនឹងទំហំ និងពណ៌យ៉ាងដូច្នេះថា «បន្ទប់ទទួលភ្ញៀវយ៉ាងហោចណាស់គឺមានទំហំចាប់ពី ៤ x ៤ម៉ែត្រ បើមានទំហំធំជាងនេះកាន់តែប្រសើរ»។ ចំពោះពណ៌យើងអាចជ្រើសរើសតាមចំណង់ចំណូលចិត្តយើងបាន។
បន្ទប់ទទួលភ្ញៀវគួរតែមានក្លិនក្រអូបដូចក្លិនបុប្ផា ក្លិនសូប៊ឺរី ឬ ក្លិនទៀន និងបរិយាកាសខាងក្នុងបន្ទប់មានខ្យល់ត្រជាក់អាចបានមកពីខ្យល់ ធម្មជាតិ ឬចេញពីម៉ាស៊ីនត្រជាក់ និងកង្ហារ។ ការរៀបចំបន្ទប់ទទួលភ្ញៀវ ឲកាន់តែស្អាត និងជាទីចាប់អារម្មណ៍ នោះបងស្រី ដាភា ប្រធានគ្រប់គ្រងរចនាប្លង់ម៉ូតបន្ទប់របស់ក្រុមហ៊ុន ស្ពេស ឌីហ្សាញ (Space Design) និយាយថា « បន្ទប់ទទួលភ្ញៀវសំខាន់ត្រូវមើលទៅលើផ្ទះយើងសិន ថាតើផ្ទះនោះជាប្រភេទផ្ទះខ្មែរបុរាណឬសម័យ។ ផ្ទះបែបបុរាណយើងត្រូវរៀបចំបំពាក់សម្ភារៈគ្រឿងសង្ហារឹម ក្នុងបន្ទប់បែបបុរាណ ហើយបើសម័យវិញនោះ ការរៀបចំរចនាម៉ូត នឹងត្រូវបំពាក់គ្រឿងសង្ហារឹមទាន់សម័យ»៕
0 comments:
Post a Comment
Welcome To 4khmerarchitect Website