បច្ចុប្បន្ននេះមានការសាងសង់សំណង់ផ្ទះល្វែងជាច្រើន និងមានកាសែតទស្សនាវដ្តីជាច្រើនផងដែរ និយាយពីការទិញលក់ជួលផ្ទះល្វែង។ ប៉ុន្តែពួកគេពុំទាន់ឃើញមានអត្ថបទមួយណា ដែលនិយាយអំពីការជ្រើសរើសផ្ទះល្វែងប្រភេទណាដែលផ្តល់សេចក្តីសុខ និងភាពចម្រុងចម្រើនដល់ក្រុមគ្រួសារ និង សមស្របតាមក្បួនហុងស៊ុយនៅឡើយទេ។ នេះជាចំនុចសំខាន់ដែលលោកអ្នកគួរពិចារណាដើម្បីជ្រើសរើសផ្ទះល្វែងឲ សមស្របទៅតាមក្បួនហុងស៊ុយ។ទស្សនាវដ្តីគេហដ្ឋាននឹងជ្រើសរើសវិធីសាស្ត្រមួយចំនួន មកបង្ហាញជូនមិត្តអ្នកអានឲបានជ្រាបថា គួរជ្រើសរើសផ្ទះល្វែងបែបណាឲសមស្របទៅតាមក្បួនតម្រាហុងស៊ុយ។
១.ផ្ទះល្វែងចំហទ្រូងៈ ផ្ទះល្វែងស្ថិតនៅក្នុងប្លុកពាណិជ្ជកម្ម ដែលបើកទ្វារចេញចូលទាំងមុខទាំងក្រោយ ដើម្បីប្រកបមុខរបររកស៊ីចាត់ទុកថា ផ្ទះល្វែងចំហទ្រូង ធ្វើឲជោគលាភហូរចេញយ៉ាងឆាប់រហ័ស។
២. ដើមឈើងាប់ជោគរលាយបាត់ៈ បរិវេណមុខផ្ទះល្វែងមានដើមឈើងាប់នៅពីមុខ ហើយថ្នល់រាំងខ័ណ្ឌចែកផ្លូវ ចាត់ទុកថាមិនល្អទេ ព្រោះវានឹងធ្វើឲកាត់ជោគលាភ លុយកាក់ស្រុតចុះ និង ជីវភាពគ្រួសារចុះទាប។ អ្នកគួរតែកាត់ដើមឈើងាប់នោះចោល ប៉ុន្តែប្រសិនបើដើមឈើនោះមិនទាន់ងាប់ទេ ហើយអាចចេញស្លឹកផ្កាសារជាថ្មី ចូរកុំកាប់វាឲសោះ។
៣. ផ្ទះល្វែងទល់មុខកន្លែងឃ្លាំងៈ កន្លែងឃ្លាំងនៅក្នុងក្បួនតម្រាមានន័យថាសំដៅលើវត្តអារាម ព្រះវិហារ និង ទីលានបញ្ចុះសពជាដើម។ ផ្ទះល្វែងដែលស្ថិតចំពីមុខទីកន្លែងដូច ខាងលើគេចាត់ទុកថាមិនល្អទេយូរៗទៅគ្រួសាររស់នៅគ្មានសេចក្តីសុខ និងតែងតែមានភាពរញ៉េរញ៉ៃក្តៅក្រហាយ។
៤. ផ្ទះល្វែងបែរមុខទល់ថ្នល់ដែលបុកមករកៈ ផ្ទះល្វែងដែលស្ថិតនៅក្នុងតំបន់មានភូមិសាស្ត្រល្អ ផ្ទះខ្លះស្ថិតនៅត្រង់ចំណុចបែរមុខមករកថ្នល់បុករកចំថ្នល់តែម្តង ដូចជាផ្លូវបំបែកជាបី ឬ ជាផ្ទះដែលស្ថិតនៅចុងបំផុតនៃច្រកផ្លូវទល់។ ផ្ទះដែលមានលក្ខណៈទីតាំងបែបនេះចាត់ទុកថាអាក្រក់ណាស់មនុស្សក្នុង ផ្ទះនឹងជួបឧប្បត្តិហេតុគ្រោះថ្នាក់ដោយប្រការណាមួយជាមិនខាន។
៥. ផ្ទះល្វែង ឬ វីឡានៅច្រកផ្លូវទល់ៈ ប្រសិនបើអ្នកជ្រើសរើសផ្ទះល្វែង ឬវីឡានៅផ្លូវទល់ ឬក៏ជ្រើសរើសផ្ទះល្វែងនៅចំណុចក្រោយគេ គេចាត់ទុកថាមិនល្អទេ ហើយរបររកស៊ីក៏មិនឡើងដែរ។
៦. ផ្ទះល្វែងដែលនៅកាច់ជ្រុងៈ ផ្ទះល្វែងដែលនៅកាច់ជ្រុងមិនថាតែទីកន្លែងស្នាក់អាស្រ័យ ឬកន្លែងធ្វើការនោះទេ ផ្ទះបែបនេះក៏មិនល្អដែរ។ គួរជៀសវាងផ្ទះប្រភេទបែបនេះ។
៧. ជណ្តើរបែរទៅមុខចំទ្វារៈ គឺមិនល្អឡើយ។ រឿងជណ្តើរឡើងផ្ទះសំខាន់ណាស់ប្រសិនបើយើងសាងសង់ចំទិសហុងស៊ុយល្អ ផ្ទះល្វែងដែលមានទ្វារចូលឈមមុខជាមួយជណ្តើរ គឺជាប្រការល្អ និងនាំមកនូវជោគលាភសំណាងមាសប្រាក់ដល់យើង៕
ដកស្រង់ចេញពី ទស្សនាវដី្តគេហដ្ឋាន
0 comments:
Post a Comment
Welcome To 4khmerarchitect Website